日本美食數之不盡！想喺朋友聚會揀支合適嘅清酒搭美食？其實唔難！等酒和器唎酒師親自教你幾個簡易招式，唔識都即刻變做有啲清酒知識！
第一式：
清新味淡食品（如沙律、前菜、鮮番茄意粉），配搭花、果香強烈嘅「薰酒類」。而「薰酒類」主要以吟釀系為主，多數適合冰飲，夠哂氣香甜口！
第二式：
大部分美食都夾到嘅「爽酒類」，多數係本釀造及生酒。因為爽酒多數係比較輕爽淡麗，唔會過份搶走食物原味，作為配襯食品係最理想不過！可以夾到嘅食物，有：生蠔、白身魚刺身、炸蝦等。
第三式：
濃味美食配濃醇酒香嘅醇酒，通常係帶有礦物味同有後勁嘅純米酒為主，勁度十足，啱哂串燒、拖羅、ShabuShabu火鍋等！
第四式：
成熟嘅味道，就係要有成熟嘅熟酒類去提昇美味！以長期熟成酒、古酒、純米酒為主，通常有重焦糖味同餘韻留長，令熟成芝士、燒鰻魚、肉味強烈美食嘅味道大大昇華！
學到以上簡易入門式，下次試試自己Order清酒配美食啦！